Plantun de Prouvènço

Pèr coumpara dos planto d'encò nostre

Lathyrus incurvus & Stellaria media

Lathyrus incurvus

Fabaceae Leguminosae

Nom en français : Gesse à gousses incurvées.

Descripcioun :
Aquelo jaisso, que nous vèn d'Asìo centralo, trachis au nostre soulamen en Camargo. Douno d'èr à la raro jaisso-de-palun, lathyrus palustris. Pamens se n'en destrìo emé si fueioun mens prim emé lou bout redoun (e mai noumbrous), sis estipulo pu pichoto, sis alo de flour blanco e peréu si dóusso qu'an la baneto enarcado.

Usanço :
Couneissèn pas d'usanço particuliero pèr aquelo planto. Ramentan qu'èi pas counseia de manja li grano, que soun empouisounanto e dounon uno malautié néuroulougico, lou latirisme (presènci d'ODAP).

Port : Grando erbo
Taio : 50 à 120 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Lathyrus
Famiho : Fabaceae
Famiho classico : Leguminosae

Ordre : Fabales

Coulour de la flour : Vióuleto
Petalo : irreguliero
Ø (o loungour) flour : 1,5 à 2 cm
Flourido : Printèms - Estiéu

Sòu : Ca
Autour basso e auto : 0 à 50 m
Aparado : Noun
Mai à setèmbre

Liò : Prado - Palun
Estànci : Mesoumediterran
Couroulougi : Siberiano
Ref. sc. : Lathyrus incurvus (Roth) Willd., 1802

Mourihoun

Stellaria media

Caryophyllaceae

Àutri noum : Paparudo, Trisseto, Esteleto, Bourassou.

Noms en français : Mouron des oiseaux, Morgeline.

Descripcioun :
Erbo basso coumuno à mita couchado que fai de pichòti flour blanco que sèmblon d'estello. Li petalo soun fendasclado sus quàsi touto la loungour, li fueio soun un pau pounchudo, óupousado, aquéli d'en bas emé un pecoui au contro de li d'en aut.

Usanço :
Maugrat que caup un pau de sapounino lou mourihoun pòu rintra dins l'ensalado champanelo. Pamens vau mies lou culi quouro flouris pèr pas s'engana emé lou mouroun rouge (o blu), Anagalis arvensis, qu'èi bèn mai dangeirous (caup de ciclamino). Lou mourihoun èi vertuous contro li proublèmo de pèu e ajudo à lucha contro li mau d'os e mai encaro.